POSTAIS DOS ALUMNOS DE 6º. NADAL 2014

    A partir das composicións sobre arte xeométrica que fixeron anteriormente, os alumnos e alumnas de 6º de primaria elaboraron unhas postais de Nadal que queren compartir con vos. Eles realizaron na clase un power point con gifts animados e outra música, pero por "motivos técnicos" non se poden subir aquí.  

Que estas postais sirvan de felicitación para todos: BO NADAL!

 

NESTE NADAL: LER E DISFRUTAR !

  Para o Nadal, desde o Equipo da Biblioteca fixemos esta guía cunha selección de libros que nos parecen interesantes. Están recomendados para os máis pequenos, para pequenos lectores, para lectores autónomos e sobre todo para compartir en familia. Esta semana os alumnos levarán un tríptico coa mesma guía.
    Esperamos que os disfrutedes!

PREMIOS AS CABAZAS E COMPOSICIÓNS DE OUTONO

  O venres, na Biblioteca do Centro, fíxose a entrega dos premios dos concursos de cabazas e composicións de outono organizados polo equipo de Actividades Escolares.  Ana, como coordinadora do equipo, e a directora Lita repartiron os diplomas de participación nas cabazas para os alumnos de primaria e despois entregaron os agasallos aos traballos premiados que, no caso de primaria, foron otorgados por votación dos propios rapaces. No kizoa que enlazo abaixo están todos os traballos premiados. Como veredes nas fotos os alumnos de infantil estaban un chisco "emocionados" polo seus primeiros premios. Os traballos eran todos fantásticos, moi bós e creativos, sendo realmente dificil separar categorías, valorar os que fixeron sós e os que fixeron con moita axuda, e desde aquí agradecemos aos rapaces e aos pais e nais a participación neste concurso. Esperamos que pasárades un rato entretido planexando, buscando os materiais e realizando estas composicións cos vosos fillos, que era (premios aparte) do que se trataba. Moitas grazas a todos. 

PREMER PARA VER A ENTREGA DE PREMIOS

CABAZAS PREMIADAS NO CONCURSO

     Estas son as cabazas premiadas entre todas as expostas durante o Samaín. As de primaria foron escollidas por votación dos alumnos. A decir verdade a selección non era nada doada pola calidade dos traballos presentados para esta actividade organizada polo equipo de Actividades Extraescolares. Así que aquí están as gañadoras, pero todas eran merecedoras de recoñecemento. 

Podedes ver o resto das cabazas  premendo AQUÍ. 

Grazas a todos por participar!  

PREMER NA IMAXE PARA VER AS CABAZAS PREMIADAS

SOMOSPAISAXE.COM

   Desde a Ampa comentáronnos a participación de alumnos de este cole nunha nova iniciativa para comprender e respetar a paisaxe. Unha serie de 6 videos (de momento) no que os pequenos, tanto de infantil como de primaria, responden coas  súas propias palabras a preguntas como qué é unha paisaxe?.

    Eu póñovos aquí o que está no portal da Consellería: "A Xunta e a Fundación Galicia Sustentable lanzan a web www.somospaisaxe.com para contribuír á implicación da sociedade na defensa da riqueza territorial de Galicia.   A finalidade deste portal é a de contribuír a que xurda unha conciencia social sobre a importancia dos retos que hai que afrontar desde a paisaxe como elemento estratéxico de competitividade

    Para conseguir esta implicación, o Instituto de Estudos do Territorio xunto coa Fundación Galicia Sustentable, ten traballado nun proceso atractivo para achegar a Estratexia Galega da Paisaxe á poboación que se estrutura en tres etapas: coñecer, comprender e actuar
 

   Acompaña á presentación do portal web unha primeira entrega da serie de vídeo Pequepaisaxes, para que nos expliquen cuestións relacionadas coas paisaxes"

 

PREMER NA IMAXE PARA VER OS VIDEOS

GERÓNIMO STILTON EN SANTIAGO

   Mañán estará en Santiago, Gerónimo Stilton, o rato máis coñecido de Ratonia, protagonista dunha serie de libros para nenos a partir de 8 anos creados pola escritora italiana Elisabetta Dami, que asina como o escritor ficticio Gerónimo Stilton. Foron publicados orixinalmente en Italia no ano 2000. Segundo indícase nos libros, o apelido do protagonista deriva do queixo Stilton.

 Asinará os seus libros na librería San Pablo da rúa do Vilar entre as 12 e as 2 da tarde.

OS CASTAÑÓNS DA MAÍA

     Facer os CASTAÑÓNS DE OUTONO xa case é unha tradición no noso colexio proposta polo Equipo de Actividades Extraescolares. Os rapaces empregaron todo tipo de materiais para crear o seu castañón e poñelo nas portas das clases. Houbo de todo: están os minimalistas e os matéricos, os naturalistas e os xeométricos, os pintados, picados, recortados, trenzados e pegados... pero todos, desde os máis pequenos de 3 anos ata os de 6º deron boa mostra da súa creatividade. PARABÉNS RAPACES!

PREMEDE AQUÍ PARA VER OS CASTAÑÓNS DA MAÍA

COMPOSICIÓNS DE OUTONO

    Estas presentacións mostran as COMPOSICIÓNS DE OUTONO feitas polos alumnos e alumnas do colexio, tanto en infantil como en primaria  en colaboración con seus pais, seguindo a proposta do Equipo de Actividades  Extraescolares. Empregaron para os traballos todo tipo de follas e produtos naturais destas datas... todo recollido no seu entorno  máis próximo. E o resultado como podedes ver é impresionante. Aproveitade estos días para visitar as exposicións, xa que  todos os traballos están nas entradas de ambos edificios.

    Aos máis pequenos sirveulles ademáis para coñecer distintos tipos de árbores e follas, froitos secos e carnosos, autóctonos e vidos de fora, comestibles ou non... e para comprobar que moitas veces a natureza nos ofrece recursos tan interesantes, artísticos e divertidos como calquer xoguete. O que temos é que saber empregalos con respeto e coidado... 

 

PREME AQUÍ PARA VER AS DE INFANTIL

PREME AQUÍ PARA VER AS DE PRIMARIA

MES DA CIENCIA EN GALEGO

   Novembro é o mes da ciencia en galego e na Asesoría de bibliotecas escolares realizaron esta recompilación de recursos dixitais relacionados coa ciencia, en galego. Está posto a disposición de todas as bibliotecas: libros e unidades didácticas, páxinas web de institucións, museos e asociacións de profesores e divulgadores científicos, convocatorias e propostas, blogues de ciencias  e  experiencias realizadas a través das bibliotecas dos centros escolares etc. Premede na imaxe de abaixo para ver todos esos recursos que nos ofrece a Asesoría.

     Pola nosa parte, desde o Equipo de Dinamización da Biblioteca propuxémoslles aos alumnos que realizasen un traballo sobre ARTE XEOMÉTRICO partindo de imaxes que sacamos dos libros do noso fondo. Pronto poñeremos aquí o resultado de esta actividade.

RECOPILACIÓN DE MATERIAIS DE CIENCIA EN GALEGO

CONCURSO DE CABAZAS DO SAMAÍN

 

  Durante esta semana o colexio encheuse de CABAZAS DECORADAS para participar no CONCURSO organizado polo Equipo de Extraescolares. Na entrada do colexio e polos corredores dos edificios de infantil e primaria tivemos unha exposición dos traballos realizados polos nenos e nenas en colaboración con seus pais. Unha invasión terrorífica con moita imaxinación, na que os rapaces mesturaron a imaxinería propia da tv e o cine, co Halloween e coas tradicións de orixe celta que nos son máis propias. No Samaín celebramos o fin da colleita... e tamén lembramos o costume das tribos guerreiras celtas de cortar as cabezas dos seus enemigos e "decorar" as entradas das casas cos seus cranios.

 En estos videos podedes ver as cabazas que estiveron expostas en ambos edificios e esta semana publicaranse as cabazas gañadoras nas distintas categorías.

   premer aquí para ver as cabazas de infantil

premer aquí para ver as cabazas de primaria

MIGUELANXO PRADO ADICOUNOS O DRAGÓN QUE CAMBIABA DE CONTO

   Asistimos en Santiago á presentación por parte de MIGUELANXO PRADO  do libro "O DRAGÓN QUE CAMBIABA DE CONTO CANDO ESBIRRABA" que ilustra en colaboración con DAVID ACEITUNO que é o autor de esta divertida historia. Tamén presentaba “MAR INTERIOR”, unha escolma da súa obra que dou pé a exposición do mesmo nome que se pode ver actualmente no Museo das Peregrinacións de Santiago.       

    Despois do acto MIGUELANXO asinou e adicou con enorme paciencia e detalle todos e cada un dos libros que lle presentamos os asistentes. rematou pasada a medianoite!. Un deles está agora na nosa Biblioteca!. En este kizoa poño algúns dos dibuxos dos personaxes do conto que lle vimos facer acompañando as  sinaturas.

PREMER  AQUÍ  PARA VER AS FOTOS

MIGUELANXO PRADO E O DRAGÓN QUE ESBIRRABA

     Por si vos queredes achegar  a un dos nosos mellores e máis recoñecidos ilustradores!. Hoxe ás 8 vai estar  Miguelanxo Prado na libreiría Cronopios de Santiago da rúa Alfredo Brañas  presentando o libro "O DRAGÓN que cambiaba de conto cada vez que esbirraba"e asinando exemplares.  


 Na Biblioteca temos esta divertida historia narrada por David Aceituno coas fermosas ilustracións de Miguelanxo e os máis pequenos encantáronlles as aventuras do dragón alérxico que anda de conto en conto cada vez que esbirra.

  
  Os máis maiores coñeceredes albúms como ARDALÉN, ou os seus traballos para XABARÍN e OINK..., en animación DE PROFUNDIS  (nominada aos premios GOYA) , OS VIXIANTES DO CAMIÑO, MEN IN BLACK ...ou en banda deseñada A MANSIÓN DOS PAMPÍN.... e moitas máis! 

  

UN PASEO POLA BIBLIOTECA !

  

    Actualizamos a guía visual da Biblioteca: Leodoro, a nosa mascota, mostra neste Kizoa as fotos coas diferentes zonas que fomos renovando e invítanos a visitar a súa casa... a nosa casa! .

  

    Esta  presentación tamén estará posta estos días na pantaia da entrada do colexio.

Esperamos a vosa visita!

premede na imaxe para entrar

Ceip A Maía inicio do curso 2014-2015

Co lema "O CONTORNO COÑECIDO É O MÁIS QUERIDO" iniciamos no Ceip A Maía un novo curso cheo de espectativas interesantes e desde a Biblioteca intentaremos ofertar proxectos que se encaixen dentro de este tema. Sempre  é máis interesante partir do coñecemento do que temos a carón para máis adiante abarcar outras cousas:

    Non podemos pretender concienciar ós nenos  de que coiden o planeta , se desde pequenos non lles facemos ver a necesidade e a realidade de pequenos proxectos no seu propio entorno tanto físico coma socio-cultural.

   
  Pensando en pequeno, faremos que os nenos de hoxe pensen en grande o día de mañá…

   
   







  A palabra edificio quere dicir facer lume (do indoeuropeo æde, lume e do latín facere, facer), o que non debe estrañar cando se segue dicindo fogar á vivenda. Da orixe do nome parece desprenderse que os primitivos serviron para albergar o lume, evitando que o apagasen a choiva ou o vento, pois non era sinxelo acendelo. Agora mesmo somos testemuñas da construcións de edificacións verdes, en consonancia co medio ambiente. “Vivir amigablemente” é o lema que promoven os promotores destas construcións, co obxectivo de preservar a saúde do ser humano e protexer o ecosistema.

          

   Hai que buscar a harmonía entre os edificios e os seus ocupantes, tanto nas vivendas coma nos centros educativos, reducindo ou eliminando o impacto negativo que teñen as construcións no medio ambiente.

     O ambiente de aprendizaxe é algo máis que un edificio, unha disposición do mobiliario ou unha colección de centros de interese. O centro escolar debe funcionar como un ERGOSISTEMA SAUDABLE no que as interaccións entre o contorno e as persoas se desenvólvan de xeito frutífero, pedagóxico e seguro .

   En cambio no noso caso parece claro que a presión sobre o centro favoreceu as consecuencias tráxicas da urbanización no contorno escolar: máis nenos fixeron necesarios máis edificios e polo tanto reducíronse cada vez máis os espazos verdes… Por eso temos a obriga de conseguir un entorno escolar de calidade medioambiental:

Conservamos  só o que amamos
amamos  só  o que entendemos
entendemos  só o que nos enseñaron.

Por outra banda o concello de Ames ten na súa web esta interesante páxina que nos achega tanto ao contorno físico como ao patrimonio socio-cultural.

PREMEDE na imaxe para entrar.

MUSEO DA PREHISTORIA DE CEIP A IGREXA DE CALO: VISITA OBRIGADA !

       Este mércores abreu o MUSEO DA PREHISTORIA  DO CEIP A IGREXA DE CALO na Zona Cultural do Corte Inglés de Santiago. Estará aberto ao público ata o día 15 de xullo. O máis curioso deste museo é que xurdeu da pregunta dunha nena sobre unha foto do petroglifo de Cornide. A partir de eso Isabel Calvelo e Anxos Vázquez, as mestras das clases de 5 anos do CEIP A Igrexa-Calo, fixeron un proxecto de traballo no que implicaron a todos: alumnos e pais. Se contades coma mín coa sorte de ter unha "visita guiada" por Anxos Vazquez, unha das mestras que levou a cabo este traballo, disfrutaredes co museo e as experiencias que tiveron para recrealo.

maqueta do petroglifo de Cornide

   Para a actividade incluso contaron con arqueólogos e expertos en instrumentos musicais primitivos. A  impresionante resposta dos pais e nais foi a recreación de máis de 100 pezas que explican a Prehistoria.  Despois contaron  coa asociación Cultural Colectivo A Rula, coa ANPA, con comercios da zona e, para expoñelo por primeira vez, co magnífico local do Corte Inglés.

    Os nenos de 5 anos traballaron no proxecto durante meses e tamén fixeron un video que se proxecta durante a exposición. O museo conta con 100 pezas elaboradas en distintos materiais (madeira, pedra, coiro, barro...) e tamén maquetas e dioramas que reflicten diversos motivos (a vida nas covas, os castros, dolmens, o lume...). As pezas están repartidas por seccións: aparellos e ferramentas, armas, vivendas, construccións megalíticas, instrumentos musicais e pinturas rupestres... EN RESUMO: UN MUSEO DE VERDADE ELABORADO POLOS NENOS E AS NENAS DE 5 ANOS!. 

A maneira que temos para que os pequenos coñezan, aprendan e respeten a Historia e o noso legado é xogar con ela.

 Noraboa polo fantástico traballo!

  O museo vai ser itinerante e estos son os puntos onde teñen previsto expoñelo:

3  -  15	xullo	Corte Inglés de Santiago (zona cultural).
17 -  31	xullo	Centro sociocultural O Ensanche.
15  -  30	setembro	Rosalía de Castro.
6  -  31	outubro	Biblioteca Anxel Casal.
3  -  30	novembro	Local Sociocultural de Luou
máis adiante	decembro	probablemente no MUPEGA

 PARA MÁIS INFORMACIÓN PREMEDE  NAS IMAXES:

O MUSEO NA VOZ DE GALICIA

colectivo A RULA. OS PETROGLIFOS DE CORNIDE

O MUSEO NO CONCELLO DE TEO