20 dic. 2015

Bo Nadal desde a Biblioteca!

Desde a Biblioteca desexámosvos Bo Nadal:

"...un  Nadal  que amose
 como vai a vida             
un Nadal que cure         
con paz as feridas         

un Nadal 
                                    que abrigue
un Nadal  
                             turrón!
un Nadal 
                                     que acougue!
un Nadal   
                              canción!"
(Antonio G. Teijeiro)            
         

Esta árbore decora a entrada do centro.  


9 dic. 2015

O mellor agasallo para o nadal 2015 : unha boa lectura!

   Este nadal a guía foi elaborada entre todas as Bibliotecas escolares do concello de Ames, ás que podedes chegar através das ligazóns que están nas portadas do tríptico, que ademáis teredes en papel.
Tedes acceso a máis guías premendo nas ligazóns e tamén premendo na páxina deste blog. 






8 dic. 2015

Exposición sobre Neira Vilas

  
      Nos paneis da  Biblioteca e nos corredores do piso de arriba montouse unha exposición fotográfica sobre a visita de Xosé Neira Vilas ao noso centro. Expuxéronse algúns dos libros que forman parte do noso fondo bibliográfico. O libro de visitas, no que nos deixou unhas palabras, e os libros que nos adicou, tamén son mostras da súa agarimosa presenza entre nós.

 



29 nov. 2015

Homenaxe nos alumnos e alumnas de 6º a Neira Vilas

       Segundo escribín na entrada anterior, Xosé Neira Vilas estivo falando  cos rapaces de 6º B a mesma mañá do xoves. Por unha serie de coincidencias chamou  por teléfono cando eles estaban a piques de ler un dos seus poemas e falou cos nenos a través da súa profe. Fíxolles prometer que sempre lerían poesía... Agora as rapazas e rapaces enviaronlle a Marina  a súa homenaxe personal a este gran escritor e aquí vola poño tal e como eles a escribiron:
 



"HOMENAXE do alumnado de 6ºB a Xosé NEIRA VILAS

Ai, amor!

Que lonxe!  Que lonxe estás!
Canta terra entre nós dous.
Pero dende que te fuches.
Ai, amor!  Ai, amor!

(Xosé Neira Vilas)


     O grupo de alumnos e alumnas de 6º B do Ceip A Maía tivemos a sorte de poder lerlle o poema “Ai, amor!” a Xosé Neira Vilas; escoitarlle e recibir, da súa parte, agarimosas palabras, animándonos a seguir lendo poesía.
    Isto que contamos, tería pasado en centos de veces con nenos e nenas de toda Galicia. Pero, no noso caso, foi algo especial: ocorreu o xoves día 26 de Novembro pola mañá, e esa mesma noite, faleceu na súa casa.
   Estas son as nosas palabras de homenaxe e recordo ao escritor. E queremos que vaian acompañadas dunha promesa: non esqueceremos ler poesía nin as súas obras en prosa!
     Balbino e Ruliño están tristes. Botan de menos ao seu pai.
    Os nenos queremos que Xosé volva ás nosas vidas. De calquera xeito, sempre estará no noso corazón.
                                                       As alumnas e os alumnos de 6º B."

27 nov. 2015

Xosé Neira Vilas, un rapaz de aldea.

    “Eu son Balbino. Un rapaz da aldea. Coma quen dis, un ninguén…” con estas palabras comeza o libro máis lido e traducido da literatura galega  “Memorias  dun neno labrego” desde a súa publicación en 1961.  D. Xosé-Balbino foi testemuño da vida rural en Galicia nun tempo pasado, pero non tan lonxano, no que decía que "a pesar da fame, das zocas, das carenzas e necesidades, os rapaces eran moi vitais e espabilados"


    Falaba desa época cunha entrañable mestura de retrato realista da vida rural, a emigración e o recordo sentimental da infancia. Durante décadas este libro foi unha lectura cotiá para os alumnos nas escolas galegas. 

  O escritor, Xosé Neira Vilas, que seguía moi activo como narrador, periodista, ensaísta e poeta, visitando colexios (entre eles o noso!) e recibindo moitas homenaxes nos últimos meses, finou esta noite aos 87 anos  na súa casa de Gres, en Vila de Cruces...... Balbino  seguirá vivo para sempre mentras teña lectores.  


    O venres 9 de decembro de 2011, Don Xosé VISITOU O CEIP A MAÍA e os nenos e nenas do 3º ciclo tiveron o privilexio de compartir uns entrañables momentos co autor do chamado best seller galego.   E aínda onte mantivo unha conversa telefónica cos rapaces e rapazas de 6º !
 
     Na visita que nos fixo andivo polos corredores do colexio  onde os titores e os alumnos lle foron amosando unha  parte dos  traballos que tiñan expostos. Falou con rapaces e profes e adicoulles os seus libros.  Podedes ver máis información desta visita premendo nesta ligazón. Tedes tamén nesa entrada o video que fixo o profe Paco durante a visita.
   Adicándonos o mural que fixeron os rapaces de 6º. Está na entrada do colexio.


Durante a charla na Biblioteca:


 Unha primeira edición das memorias de Balbino coa ilustracións de Díaz Valiño.




     A mellor HOMENAXE que lle podemos facer é coller de novo As memorias dun neno labrego, as cartas a Lelo, Aqueles anos do Moncho, Espantallo amigo, O cabaliño de buxo, A marela Taravela, Contos vellos pra rapaces novos ...
 

22 nov. 2015

VI Xornadas de Bibliotecas Escolares


   Este fin de semana  tiveron lugar as VI Xornadas de Bibliotecas Escolares de Galicia, no Palacio de Congresos de Santiago, organizadas pola  Dirección Xeral de Centros e Recursos Humanos, Asesoría de bibliotecas escolares, e a Dirección Xeral de Educación, Formación Profesional e Innovación Educativa e o CAFI . 

  Alí estiveron un milleiro de profesores e profesoras de toda Galicia, entre eles algúns dos membros do equipo  da nosa Biblioteca.

       

      O programa tiña experiencias de compañeiros e compañeiras que traballan en distintas bibliotecas escolares de Bueu, Porriño, Santa Comba, Coristanco, Lalín, Pontevedra, Lugo, a Coruña e Ourense...  Foi moi, moi interesante ver como traballan os compañeiros e en que circunstancias.  Parabéns e grazas por compartir os vosos traballos!
       Tamén contamos con expertos de distintos ámbitos que falaron dos retos que deben enfrontar as bibliotecas escolares e os centros, para facilitar a adquisición das competencias clave por parte do alumnado. Iniciamos as xornadas coa charla de Xurxo Mariño (biólogo, profesor, neurofisiólogo e divulgador científico) que nos levou a dar unha viaxe dando a volta ao mundo para interpretalo a través da cultura, a ciencia, a literatura e a arte,  unha viaxe ao grande, pero que se inicia no noso contorno máis cercano, 

despois Carlos Magro, (licenciado en Físicas, Xeografía e Historia e Vicepresidente da Asociación de Educación Aberta) que nos fixo una reflexión sobre cómo enseñamos, qué enseñamos, con qué enseñamos, dónde o facemos, a quén enseñamos, quén o fai e quén xestiona o aprendizaxe nun mundo no que sobra información pero falta coñecemento, no que os mestres somos deseñadores do coñecemento e no que os alumnos teñen que ser críticos, autónomos e con capacidade para xestionar a súa aprendizaxe,  Rosa Piquín profesora  responsable dunha Biblioteca Escolar en Asturias e Premio Nacional de Proxectos de ideas para a mellora e innovación no 2005,
Guadalupe Jover profesora de Literatura e lingua castelá nun IES, premio Giner de los Rios de Innovación e portavoz da Plataforma de Cidadáns pola educación Pública que nos falou de como achegar a lectura (dos libros e do mundo) aos rapaces fomentando a súa capacidade de crítica,  Felicidad Campal, licenciada en documentación e profesora de cursos ALFIN de alfabetización informacional e rematamos as xornadas coa  profesora e psicopedagoga arxentina  Ana Siro  que nos falou do libro-album desde a perspectiva do xénero, dos lectores e dos profes como mediadores.  

    
  E recordo aquí a entrada  do blog das bibliotecas escolares na que se explica o lema deste curso 2015-16:

    O lema "Biblioteca escolar, base de exploracións" chama a traballar coa información, a mirar fóra, a facerse preguntas e pescudar posibles respostas, a interesarse polo outro, polo diferente, polo alleo; a estudar xeografías e inventar rutas para novas aventuras; a coñecer as viaxes que fixeron os grandes exploradores e aquelas outras que, cada día, bota ao camiño a milleiros de persoas na procura dun mundo máis xusto. Convida a explorar o mundo e a compartir o aprendido. 

5 nov. 2015

Exposición de cabazas do Samaín e composicións de Outono.




    No escenario da Biblioteca e nas entradas dos edificios de Infantil e Primaria temos a EXPOSICIÓN DO SAMAÍN. Desde o Equipo de Actividades complementarias  convocouse a todos os membros da comunidade educativa para que participasen. Os pais, nais, alumnos e alumnas de infantil e de primaria participaron con cabazas do Samaín e productos de Outono. Na web do colexio, premendo aquí, podedes ver as fotos da exposición con todos os traballos. 

Moitas grazas a todos por participar!

30 oct. 2015

Día das Bibliotecas: os personaxes saen dos contos

  
   Continuando coa conmemoración do Día das Bibliotecas Escolares, o pasado luns os alumnos de infantil de 5 e de 3 anos foron recibidos na nosa Biblioteca por Leodoro e as súas axudantes (vestidas de princesas, fadas, reis, capitáns, bruxas, pintores e músicos). Aínda que algúns dos máis pequenos estaban algo cohibidos, a maioría quedaron asombrados polos personaxes saídos dos contos, sobre todo polas fadas e princesas ...
 As fotos da visita dos máis pequenos están neste video:
 E neste outro están algunhas alumnas dos equipos de maiores que colaboran na biblioteca durante os recreos preparándose para  representar os seus personaxes para recibir aos lectores....  Parabens!

24 oct. 2015

DÍA DAS BIBLIOTECAS ESCOLARES: os personaxes saen dos libros!

   Este sábado 24 de outubro conmemorábase o Día das Bibliotecas Escolares e preparamos unha instalación á que lle chamamos "Mergúllate nos libros": un mar no que navegamos cada día.  O venres desde o Equipo da  Biblioteca organizouse unha actividade na que algúns dos rapaces e rapazas maiores, que colaboran  durante os recreos, recibiron aos seus visitantes cunha sorpresa: Leodoro, a nosa mascota, e uns cuantos personaxes dos contos estaban esperando ...



   Repartidos polas distintas seccións e vestidos de Princesas, Fadas e Bruxas na zona de prelectores animais na zona de ciencias, Veláquez na zona de arte e pintura, Aladín, Harry Potter na zona de lectores autónomos, e de músicos coma Mozart na zona de música, enredaron e divertíronse cos maiores e asombraron aos pequenos de 4 anos que se achegaron na hora de ler. A actividade continuará para a semana

Neste video podedes ver algunhas fotos da sesión.

11 oct. 2015

mergúllate nos libros!

    Dentro de pouco, o 24 de outubro, celébrase o Día das Bibliotecas para que todo o mundo se decate da súa importancia como "lugar de encontro de lectores grandes e pequenos co mundo da cultura e como ferramenta para mellorar a formación e a convivencia". Desde o noso Equipo escollimos este lema: "mérgúllate nos libros!". Para conmemorar esa data e ambientarnos estivemos "mergullándonos" nos fondos da  Biblioteca e atopamos moitos libros con temas mariños, para os pequenos, para os maiores, contos, albumes en 3D, novelas, banda deseñada, revistas etc... 
Temos, entre outros títulos, estes:
A praia da esperanza de Agustín Fernández Paz
Piratas do Caribe, o cofre do home morto
Teo en barco
Barxilón no mar de latón
Sabotaxe na Estaca de Bares de Manuel Riveiro
Carta das illas bailarinas de Jacques Prévert
Os piratas da illa da esperanza de Rivadulla Corcón
ondas de verde e azul de Ana Mª Fernández
los aventureros del océano.
Laia a nena da illa de Ánxela Loureiro....

   Todos están expostos no escenario esperando que vos mergulledes na súa lectura....
 Boa viaxe!
 

Novos usuarios da Biblioteca

 Os alumnos e alumnas que comezaron este curso en 1º de primaria foron recibidos como novos usuarios da Biblioteca.  
      Os rapaces xa coñecían e usaban a Biblioteca e a Leodoro desde Infantil, pero a partir de agora serán usuarios máis autónomos, así que poderán usala durante os recreos e tamén levar libros a casa.

    A presentación estivo a cargo do profe Miguel, que lles lembrou as normas de uso, as distintas zonas e servicios da Biblioteca e lles comentou como usar o carnet da Biblioteca.

Benvidos !   Esperamos que nos visitedes moito!




23 sept. 2015

premio para artistas do reciclaxe


Nayra Prado González, de 10 anos e alumna de 6º, foi a gañadora do primeiro premio  no Iº Concurso Infantil de Dibuxo Reciclar en Compostela, convocado por La Voz de Galicia e patrocinado por Urbaser.  Manuel Mosquera Dapena, de 12 años, que acaba de pasar ao instituto, tamén foi finalista no mesmo concurso. Nayra participou cun despregable sobre a imaxe da Terra cunha mensaxe para  fomentar a reciclaxe dos residuos e Manuel (que xa ten experiencia en esto de ir gañando concursos, sobre todo literarios) dibuxou o Paseo da Ferradura da Alameda. Parabéns a ambos.




20 sept. 2015

BENVIDOS AO CURSO 2015-2016!


    Iniciamos un novo curso con máis de 650 alumnos e alumnas e as súas familias, 42 profes e ademáis unha nova direción. Isabel, Rosa e María levan desde o seu nomeamento preparando un proxecto para o Ceip A Maía. Na web do colexio podedes ler completa a súa "carta de navegación", unha declaración de intencións para unha escola que debe transformarse acorde cos cambios que están a darse na sociedade para construir un futuro viable.
   Desde o Equipo de Dinamización  con Teresa (coord.), María F., Maca, Rosa, Loli, Carmen, Mercedes, Marta, Rosana, Natalia e Miguel intentaremos levar a cabo a parte que nos corresponda neste proxecto  e facer da Biblioteca un espazo de colaboración entre todo o colexio.


 Escollo aquí os principais puntos da carta escrita pola nova directora:   (ler o texto completo na web do colexio +)
 
  • "A educación é a forza do futuro.
  • "Temos que modificar o noso pensamento para adaptarnos aos cambios do mundo.
  • "Desde a escola pública, temos que ofertar unha educación  de calidade acorde cós tempos.
  • "Temos que reconsiderar a organización do coñecemento derribando as barreiras tradicionais entre as disciplinas.
  •  "Acadar para os alumnos o máximo desenvolvemento das súas capacidades individuais e sociais, garantindo a igualdade de oportunidades,  prestando os apoios necesarios.
  • "Fomentar a colaboración familia-profesorado para construír un entorno de aprendizaxe rico e motivado.
  • "Queremos un centro onde a participación de todos os sectores da comunidade educativa estean presentes nos proxectos e programas didácticos que se realicen.
  • "Queremos que a adquisición dos valores de solidariedade, compañeirismo, respecto ás diferenzas e xenerosidade cos máis débiles sexa unha pauta de conduta e identidade do centro e así favorecer a integración de todo o alumnado.
  • "Queremos xestionar dunha maneira imaxinativa e correcta os recursos cos que a Administración nos dota.
  •   "Todo isto tennos que levar a conseguir un centro onde teñamos as condicións idóneas para que o alumnado poida desenvolver as súas capacidades naturais nas mellores condicións ao longo da súa etapa escolar."  


12 sept. 2015

LETRAS, NÚMEROS, IMAXES E UN NENO NA PRAIA…




"rapaces na praia" de J.Sorolla
   Comezamos un novo curso rodeados como sempre de letras e números:  1 novo equipo directivo,  porcentaxes, axustes de horarios, recortes de mestres … un curso con 640 nenos, 75 deles nas clases de 3 anos, 75 iniciandose en primaria, outros 70 que marcharon para o instituto… Facemos números para mercar  roupa nova,  materiais, mochilas, ordenadores…
   Letras, números… e tamén  imaxes  que sacuden conciencias… A mín, como a todos, deixoume sen fala  1 neno na praia (...igual que os nosos pequenos) que xa non poderá coller as súas primeiras cores… 1 neno que debería estar xogando como os que pintou Sorolla...


    Fálase agora de cuotas, pero son persoas, 17.000 que vai acoller o noso país, un reparto frío feito nas mesas dos políticos, pero son millóns os desprazados, son millóns os que non teñen casa, escola, comida, seguridade… millóns de pais e nais que acuden a nós fuxindo da barbarie… buscando o mellor para os seus nenos, un refuxio.
 E polo medio  as teorías: dín que os nosos nenos non deberían estar expostos a esas duras  imaxes , que se poden traumar, que o que teñen que facer é disfrutar. Igual sí…Ou non…Non podemos pechar os ollos diante de esos ollos que nos miran desde o outro lado da pantalla... Porque podían ser os nosos a través do espello…

   Tamén eles tiñan unha familia,  unha casa, unha  escola, unha biblioteca, un conto favorito para durmir… E os nosos nenos deben saber a sorte que teñen por nacer deste lado do mundo no que os malos son o lobo de Carapuchiña e as bruxas do conto, no que, si choran, mamá é papá non van ter mais medo que eles polo que lles poida pasar… no que correr só é para seguir detrás dunha pelota ou ao pilla pilla… e non para salvar a vida ou coller un bocadillo que che tiran polo aire.

     Ensinámoslles a sumar e a multiplicar,  pero o mundo tamén  resta e divide…  Mentras os nosos alumnos debuxan mapas na clase de coñecemento, outros nenos atopan  fronteiras de aramio, fronteiras debuxadas para separarnos…  Fronteiras entre o norte e o sur, o este e o oeste, o  1º mundo e o 3º mundo… Máis números... Cando en realidade só temos un mundo e todos estamos xuntos nel…

Así que imos contar (e cambiar) o conto: “Fai uns días un neno chegou á praia… 

13 jul. 2015

Obradoiros de Cultura urbana e de animais mariños

 Para rematar o curso dun xeito lúdico-festivo, o Equipo de Actividades Extraescolares organizou para os rapaces de primaria tres obradoiros e trouxo os membros do equipo Vella Escola que "é unha entidade especializada na organización e difusión de actividades relacionadas coa Cultura Urbana en Galicia: breakdance, graffiti, skateboard, rap, beatbox, parkour, turntablism (DJ), street basket, danzas de rúa, bmx,  slackline, capoeira…". No cole fixeron breakdance, graffiti e beatbox.  Para levar a cabo estas actividades que unen a expresión artística e o ocio activo viñeron Dras, Pablo e David:  Abaixo están os videos coas fotos dos talleres.
      
    O resultado do grafiti dos alumnos de 6º foi un impresionante mural co nome do colexio e  con Leodoro nunha esquina.


     O autor e deseñador do proxecto, Dras, que ademáis nos comentou que estudou Belas Artes, veu pola tarde e engadiulle os dous rapaces que leen, xa que para o curso que ven temos pensado convertir esa zona nun BIBLIOPATIO. Os rapaces traballaron moi coordinados por este artista e pasárono moi ben. Parabéns polo traballo!


 O obradoiro  de grafiti dirixido  por Dras 

   
 O obradoiro de    beatbox con David             O de breakdance con Pablo  











 
    O beat box consiste "na habilidade de crear música, sexan ritmos ou melodías, efectos ou letras de forma simultánea soamente cos recursos corporais, principalmente coa boca.."
 
 O  video coas fotos dos obradoiros



    Para os pequenos de infantil trouxoselles un obradoiro para coñecer os animais mariños   co equipo de Arenaria Coordinación  Para ler máis entrade no blog da aula 3 de infantil: AQUÍ



8 jul. 2015

amadriñamentos lectores

As alumnas e os alumnos de 4º de primaria do Ceip A Maía  fixeron  de madriñas e padriños lectores para os pequenos de infantil. Coordinados pola profe Ana de Extraescolares, que os preparou e moveu entre os dous edificios, durante a hora de ler buscaron distintos espazos dentro e fora do edificio, en salas ou polo xardín xa que calquer sitio é bó para pasar un rato cun bó libro. Unha actividade para fomentar a lectura na que tanto os lectores como os oíntes disfrutaron moito. Tamén participou nos amadriñamentos unha aula de primeiro coa súa profe Natalia.   
 
 

  Esta entrada e outras similares do equipo de Extraescolares estarán tamén na web do cole na páxina de Actividades Complementarias  .